Ka ga SETSWANA.COM

Mogaetsho pelo e se nang phufa selo ya be e se sa yona. Ka lefufa le nkapere, ke bone go le botlhokwa gore ke dirise kitsonyana e e potlana e ke nang le yona ya tsa mafaratlhatlha, le lemmenyana la kitso ya Setswana gore ke dire webesaete ya Setswana e re tla ikgantshang ka yona. Maikaelelo ke gore re tsole Setswana, se nne mo pepeneneng mme mongwe le mongwe yo a itseng go buisa ka Setswana, a dire jalo go o ketsa kitso ya gagwe ka re tlaabo re kgobokantse sengwe le sengwe se se botlhokwa. Matsatsing a dilo di mmalwa tse di fatlhosang ka Ditiragalo tsa Batswana mo di inthaneteng le fa dikwadilwe ka sejatlhapi.

Bua Setswana Buisa Setswana ke porojeke e e kwadilweng ka Setswana go rotlweetsa Batswana go Buisa Setswana. Go dira sengwe sa mofuta o go tlhoka tshegetso e e tona ya matlole, go kwala, le go fetolela tse di setseng di kwadilwe, go kopa tetlelelo ya go dirisa tshedimosetso e e setseng e kgobokantswe, khomphita le inthanete, tiriso ya mogala, Maikaelelo le tse dingwe. Fa thuso ya dilo tsotlhe tse e ka nna teng re ka nna motlotlo ka tiro e e nepagetseng e sekasekilwe sentle gore e tlhagelela mo setšhabeng e nonofile. Kgwetlho e ke kopaneng le yona ke go tlhoka thuso ya tshegetso ya dingwe tse di umakilweng fa godimo. Bothata e ne e le gore, Maikaelelo, lerato, maikutlo a a monate, le phisigelo ya go dira se, ke di tsenye jang mo bathong ba ke tlhokang thuso mo go bona.

Kana motsoga pele o kile a re: mmatla kgomo kodumela o etse mhata sediba. Ke ne ka simololo go tsaya maikarabelo a go lebagana le kgwetlho ya go dira webesaete e ya Setswana, morago ga thotloetso e ke e amogetseng go tswa mo bathong ba ke ba itseng le ba ke sa ba itseng. Kakanyo e ga ke simolole le yo na fa, maloba mogasi mongwe o ne a ngongorega ka tiriso ya Setswana mo bokwading, ke ne ka etela inthanete mme ka fitlhela gore tlhagelelo ya Setswana e kotlase thata. Ke ne ka fitlhelela gore fa o tshwanetse go reka Lokwalo lwa Setswana le kwadilwe ke mokwadi wa moagisanyi o tshwanetse go le reka kwa moseja o duela ka di dolara. a me le

A o kile wa ba bona

Ke raa bo Tlhogoputswa ba imatswa ka masufu fa kgotleng ba ntse disanyana, musi o kueletse, go ntse go botsanwa matsogo le gore. O mosimane wa ra mang monna? motlotlo o ile magoletsa go neelwana maele, metlae le yona e ntse e tlhagelela fale le fale, mongwe a o me yo mongwe ka lore, e re a ribela a nne fatshe, ga jewa ditshego, bangwe meno ba sale ba a phuphurile le dithotse, go fapaanelwa phafana ya metsi masetlha, mabele mabelega batho. Monna a botsa gore, ke mosadi waara mang o a titietseng e tle a sale kwaara Mosadi a sale a titiela. Gatwe ke Mosadi waara mosala o sala kwa rra Mosala a sala a titielela Mosala. Ba bitse mosimanyana a beile lerago mo seretheng, bare mosimane itlole o ithage lerago, o bolelele bo mmemmaago gore nkgo e kgadile le rona re kgadilwe. Seatla sentse sere ke rakane le basimane ba tswa botlhaba ba ya bophirima nna ke tswa bophirima ke ya botlhaba.